अमेरिकाले सोमबार दक्षिणी इरानमा नयाँ हवाई आक्रमण गरेको जनाएको छ। अमेरिकी सेनाले इरानी मिसाइल साइटहरू तथा समुद्री सुरुङ (माइन) राख्न प्रयास गरिरहेका डुंगाहरूलाई लक्षित गर्दै आक्रमण गरिएको बताएको हो।
अमेरिकी सेनाको केन्द्रीय कमाण्ड (सेन्टकम) ले उक्त कारबाही “आत्मरक्षा” का लागि गरिएको भन्दै इरानी सैन्य गतिविधिबाट आफ्ना सैनिकलाई जोगाउने उद्देश्य रहेको जनाएको छ।
सेन्टकमका प्रवक्ता क्याप्टेन टिम हकिन्सले जारी गरेको वक्तव्यमा “इरानी फौजबाट उत्पन्न खतरा रोक्न दक्षिणी इरानमा आत्मरक्षात्मक आक्रमण गरिएको” उल्लेख गरिएको छ। उहाँका अनुसार अमेरिकी सेना युद्धविराम कायम राख्ने प्रयाससँगै आफ्ना सैनिकको सुरक्षामा केन्द्रित रहेको छ।
आक्रमण इरानको दक्षिणी बन्दरगाह शहर बन्दर अब्बास नजिक गरिएको बताइएको छ। उक्त क्षेत्र स्ट्रेट अफ होर्मुजसँग जोडिएको रणनीतिक क्षेत्र हो, जहाँ इरानी नौसैनिक अड्डा पनि रहेको छ। स्थानीय इरानी सञ्चारमाध्यमहरूले त्यसअघि बन्दर अब्बास क्षेत्रमा विस्फोटको आवाज सुनिएको र अधिकारीहरूले घटनाको अनुसन्धान गरिरहेको बताएका थिए।
यसैबीच, इरानको इस्लामिक रिभोलुसनरी गार्ड कोर्प्स (आईआरजीसी) ले मंगलबार अमेरिकी ड्रोन खसालेको तथा इरानी हवाई क्षेत्रमा प्रवेश गरेको एक लडाकु विमान र अर्को ड्रोनमाथि गोली प्रहार गरिएको दाबी गरेको छ। सरकारी सञ्चारमाध्यममार्फत सार्वजनिक गरिएको विवरणमा घटनाको समय भने खुलाइएको छैन।
आईआरजीसीले युद्धविराम उल्लंघन भएमा अमेरिकाविरुद्ध प्रतिकार गर्ने “वैधानिक र निश्चित अधिकार” इरानसँग रहेको चेतावनी पनि दिएको छ।
नयाँ अमेरिकी आक्रमणले अमेरिका–इरानबीच सम्भावित शान्ति सम्झौतामा कस्तो प्रभाव पार्ने भन्ने विषय अझ स्पष्ट भइसकेको छैन। यद्यपि अमेरिकी विदेशमन्त्री मार्को रुबियोले अझै पनि सम्झौताको सम्भावना रहेको बताउनुभएको छ।
भारत भ्रमणका क्रममा पत्रकारहरूसँग कुरा गर्दै रुबियोले इरानका शीर्ष वार्ताकार तथा विदेशमन्त्री र कतारका प्रधानमन्त्रीबीच मंगलबार हुने वार्तालाई सकारात्मक रूपमा हेरिएको बताउनुभयो। उहाँले प्रारम्भिक सहमति दस्तावेजको भाषाबारे अझै छलफल भइरहेकाले निष्कर्षमा पुग्न केही दिन लाग्न सक्ने उल्लेख गर्नुभयो।
रुबियोका अनुसार अमेरिकी राष्ट्रपति डोनाल्ड ट्रम्पले सम्झौता गर्न इच्छुक छन्। “उहाँ या त राम्रो सम्झौता गर्नुहुन्छ, होइन भने कुनै सम्झौता हुँदैन,” रुबियोले भन्नुभयो।
स्ट्रेट अफ होर्मुजबारे टिप्पणी गर्दै रुबियोले उक्त समुद्री मार्ग खुला रहनुपर्नेमा जोड दिनुभयो। उहाँले “त्यो मार्ग खुल्नैपर्छ, एक वा अर्को तरिकाले खुला हुनेछ,” भन्दै त्यहाँ भइरहेका गतिविधिलाई “अवैध, अस्थिर र विश्वका लागि अस्वीकार्य” भएको बताउनुभयो।
टिप्पणी थप्नुहोस्